OLIY TA'LIM MUASSASALARIDA DINSHUNOSLIK FANINI O'QITISHNING PEDAGOGIK VA IJTIMOIY AHAMIYATI

Mazkur maqolada oliy ta‘lim muassasalarida dinshunoslik fanini o‘qitishning pedagogik va ijtimoiy ahamiyati tahlil qilinadi. Globallashuv va axborot texnologiyalari jadal rivojlanayotgan zamonaviy jamiyatda yoshlarning diniy savodxonligini oshirish muhim vazifalardan biri hisoblanadi. Tadqiqot davomida tahliliy, qiyosiy va nazariy metodlardan foydalanildi. Maqolada dinshunoslik fanining talabalarda bag‘rikenglik, tolerantlik, tanqidiy fikrlash hamda ijtimoiy mas‘uliyatni shakllantirishdagi o‘rni yoritilgan. Shuningdek, pedagogik yo‘nalishdagi talabalar uchun ushbu fan kasbiy kompetensiyalarni rivojlantirishda muhim vosita ekani asoslab berilgan. Tadqiqot natijalari dinshunoslik fanini o‘qitish talabalarning dunyoqarashini kengaytirishi, turli madaniyat va e‘tiqodlarga nisbatan hurmat ruhini shakllantirishi hamda destruktiv mafkuraviy ta‘sirlarning oldini olishda muhim omil bo‘lib xizmat qilishini ko‘rsatadi.